'Aisea 60:1-6

Ko e Tohi ‘a e Palofita ko ‘Aisea, ko e taha ia ‘i he ngaahi tohi ‘i he Tohitapu ‘oku manakoa. Pea ‘oku ‘i ai e tui, hangee nai ko e tohi eni ‘oku manakoa taha ‘i he ngaahi tohi ‘a e kau Palofita. ‘I he tohi ‘a ‘Aisea, ‘oku ha ai e ngaahi potu folofola ‘oku maheni mo e fanau ako, ako Tohitapu. Hange ko ia ‘oku ha he ngaahi veesi ko eni; 1:18, 7:14, 9:6-7, 26:8, 40:3 mo e 31:53. Ko ha ngaahi potu folofola ‘oku makehe atu hono ngaahi lea. ‘I he tohi ko ia ‘a ‘Aisea, ‘oku ne tuku mai ha ngaahi mo’oni’i me’a fekau’aki mo e nofo ‘a e kakai ‘Isileli (mo hono sosaieti) ‘i he ngaahi ta’u ofi ki he 700 K.M. Tuku kehe ange ‘ene tuhu hangatonu mai ki he ngaahi faihala ‘a e kakai, ka ‘oku ne to e faka’ilo mai ‘oku kei ‘i ai ha ni’ihi ‘oku kei ma’u e tui totonu; pea ko e ni’ihi ia ne nau fengaue’aki ‘i he taimi na’a ne hoko ai ko e palofita. Ne ‘ikai pe to e ‘i ai ha palofita ia ‘e talanoa ki he Pule’anga Lahi (Hevani) ‘o laka hake ‘ia ‘Aisea. ‘A e pule’anga ‘oku nofo ‘amanaki ki ai ‘a e kakai ‘Isileli, ‘i he to e ha’ele mai ‘a e Misaia. ‘Oku talanoa pe ‘a ‘Aisea ia, ‘i he loloto fau ‘a e angahala ‘a e tangata pea mo e fu’u ma’olunga ‘a e kololia ‘a e ‘Otua; mo e hanganaki hoko mai ‘a e pule’anga faka-langi.

Ko e vahe 60 ‘o e Tohi ‘a e Palofita ni, ‘oku talanoa ia ki ha me’a lalahi ‘e 2. Ko e nofo melino, pea mo e tu’umalie ‘oku ‘amanaki hoko mai. Hange ko ia ‘oku ha he ‘uluaki veesi, ko e kololia ‘o e ‘Otua ‘oku ‘amanaki ke hoko mai ki ‘Isileli. ‘Ikai tu’unga ia ‘i ha ngaue ‘a e tangata, ka ko e ‘ofa ‘ata’ataa pe ia ‘a e ‘Otua; pea ne finangalo ai ke ne haofaki’i hotau fa’ahinga. Talamai ko e maama (tapuaki) ‘e ‘omi ia ma’a ‘Isileli. Pea ‘e hoko ‘a ‘Isileli ko ha pule’anga/kakai ‘oku ULO atu. Pea ko e ulo ko ia, ko e ulo (pe maama) fakalaumalie; ‘o maamangia ai ‘a e ngaahi pule’anga. Ko e ulo ko eni, ko e faka’ilo hala. Pea ko e faka’ilo hala, ko e ‘ilo ‘e he ngaahi pule’anga ‘a e folofola ‘a e ‘Otua mo hono kololia. Pea ‘i he’ene pehee, ‘e fakataha mai ki ‘Isileli ‘a e ngaahi fa’ahinga kotoa; koe’uhi pe ko e maama ‘oku ulo meiate ia. Ko e tapuaki ‘o e fakamo’ui kiate kinautolu ‘oku nofo ‘i he po’uli (fakalaumalie). Pea ko e ngaahi me’a kotoa ko eni, ‘e hoko ia ‘i he mileniume.

Ko e tu’umalie ‘o e fonua, ‘oku hanganaki hoko ia ki ‘Isileli. Pea ‘i he kamata ‘o e mileniume, ‘e fakataha kotoa ‘a ‘Isileli ki honau fonua. ‘Io, ko ‘ene fanau (v.4) ‘e omi mei he mama’o. Pea ‘e fiefia ‘a ‘Isileli ‘i he foki mai ‘a hono kakai mei he ngaahi pule’anga (v.5). Talamai ‘e le’eia mai ki ‘Isileli ‘a e mahu ‘o e tahi; pea ‘e ha’u kiate ia ‘a e koloa ‘o e ngaahi pule’anga. Ko e “mahu ‘o e tahi” mo e “koloa” ko hono heliaki pe ia ‘a e mahu’inga mo e fu’u toko lahi ‘a e kakai ‘e tanaki ki ‘Isileli. Pea ‘i he’enau foki ki ‘Isileli, te nau foki mo ha tu’umalie; ‘o hange ko ia ko e koula mo e laipeno. Pea ko e ngaahi fonua te nau omi mei ai, hange ko Mitani (faka-tonga ‘o e Tahi mate), mo Efa (ko e va’a pe ‘o Mitiani, he ko ko e tamai ‘a Efa ko Mitiani), mo Sipa (faka-tonga ‘o ‘Alepea). Pea ‘oku ‘i ai mo e ngaahi fonua kehe ‘oku talanoa ki ai ‘a e Tohi ‘a e palofita ni; hange ko ia ko  keta, mo Nepaote, mo Tasisi. Ka neongo ‘oku ou tokanga pe ‘i heni ki he foki mai ‘a e kakai ‘Isileli ki honau fonua, ka ‘oku nau foki mo ha ngaahi koloa. Kotoa ‘a e kakai ko eni mo ‘enau koloa ‘e ngaue’aki ia ke fakalangilangi’i e ‘Otua ‘aki hono teuteu’i e temipale tapu (longolongo hoifua v.7). Pea ‘e hoko ia ko e langilangi ‘o e ‘Eiki Tapuha.

Ko e fehu’i. Te ke kau nai he fakataha ko eni? Pea ko e ha leva ho’o koloa ke teu ‘aki e temipale ‘o e ‘Otua?

Teke ‘i ai?