Fakaha 5:11-14
“Ko hai ‘oku pule?”, "Ko hai 'oku taki?"
‘E tokoni lahi ‘aupito ‘a Fakaha 5 ke tali e ‘a e fehu’i ‘oku fa’a ‘ekea ma'u pe, ‘i he ngaahi to’utangata: “Ko hai koaa ‘a Sisu?”
Kuo hoko mai eni ‘a Sione, ‘o ne fokotu’u mai ‘a e feitu’u ke ma’u ai ‘a e tali – ‘a Hevani. Hili e tohi ki he ngaahi siasi ‘e fitu (‘i he vahe 3-4), pea hoko hake ai pe ‘a e visone ‘a Sione ‘o talanoa ki Hevani (4:1). ‘Ikai ngata ai, ka ‘oku taafa-taha pe ‘a Sione ki he taloni ‘o e ‘Otua pea mo hono fakahikihiki’i.
Ko e vahe 5 ‘oku talanoa pe mo ia ki Hevani. Ko e ‘otua (5:1) ‘oku ne pukepuke ha takainga tohi kuo sila’i’aki e fitu’i sila. Pea ‘oku kumi ‘e he kau angelo ha taha ‘oku taau ke ne fakaava ‘a e takainga tohi – kae ‘ikai pe ma’u ha taha. Pea ko e fakakaukau, ka ‘ikai lava ‘e ha taha ‘o fakaava e takainga tohi ni; pea ko e ongo palani ‘a e ‘Otua (‘a ia ko hono ikuna’i ‘o e tevolo pea pehee ki he hoko mai ‘a e ‘Eiki, ko e pule aoniu) – he’ikai pe malava ia ke hoko, kae’oua pe kuo fakaava ‘a e takainga tohi ni.
Too hifo e loto ‘o Sione, he siva e ‘amanaki. Kae ‘unu mai ha taha ‘o ne fanafana kia Sione, ke tuku ‘ene tangi, he ko e Laione Siuta kuo hoko mai pea ko ia ‘a e taha ‘oku taau. ‘I he tafoki ‘a Sione ke vakai ki he Laione, taa ko e Lami ‘oku tu’u mai; hange ha sipi ‘oku teu ke tamate’i. Ka e malie ko e lava hake ‘a e lami ki he taloni, ‘o ne to’o ‘a e takainga tohi. Kotoa e kau matu’a ne nau tutu’u he ve’e taloni, ne nau too fo’ohifo ‘o fakahikihiki’i ‘a e lami ko eni.
Hiva fetaliaki ai e kau ‘angelo, me’amo’ui ‘e faa pea mo e kau matu’a; ‘io ko e mano laui mano mo e afe laui afe – ko ha tokolahi, ‘oku ‘ikai fa’a lau.
Ko ‘enau hiva, “'Oku taau mo e Lami. ‘Oku taau mo e lami. ‘Oku taau mo e lami ne mate tamate’i.”
Ka ko e ha ‘a e lau ki he Lami? Ko e ha koaa e mahu’inga ‘o e lami ko eni?
Ko e lami, ko e fakataataa anga maheni ia he tohi Fakaha, kia Sisu. Pea ‘oku tu’u ai pe ‘a e lami ko eni, ko e taha ne kalusefai – ‘i he’ene haa he tohi fakaha. Ko e fakakaukau, ka ‘ikai ‘i ai ha kolosi, ‘e ‘ikai ‘i ai ha taau.
Pea koe’uhi ko e mahu’inga ‘o e lami ko eni, fokotu’u leva ‘e Sione ha ngaahi me’a lalahi ‘e 7 – ‘ikai 6 pe 8, ‘ikai teau, kae 7 pe! Ko e fitu foki, ko e fika ‘o e kakato – ko e fika haohaoa. Ko e anga maheni, ka ‘i ai ha fika ta'etauhoa, pea ko e fika leva ‘i loto ‘oku mahu’inga taha. Talamai ko e fika 4, ko e mafimafi/ivi/malohi. Neongo ‘a e tu’u ta’etauhoa ‘a e fakakaukau fekau’aki mo e lami ne teu ke tamate’i, ka ‘oku hanga ‘e he fika 4 ‘o talamai ko e lami ni, ‘oku taau ia ke ne fakahoko e fatongia. He ‘oku ne malohi fe’unga ‘o ‘ikai ngata pe ‘i hono fakaava e takainga tohi; ka ki hono taa hono fili mo ikuna’i ‘a e ivi ‘o e tevolo.
Ko e me’amo’ui kotoa pe ‘i Hevani, ‘i mamani, ‘i tahi mo lolofonua; mo ia kotoa pe ne ‘iate kinautolu, ne kau fakataha he hiva. Pea a’u atu ‘enau hiva ‘o pehee, kiate IA ‘oku ‘afio he taloni; ke ‘o’ona e tapuaki, ngeia mo e kololia, mo e mafimafi ‘o ta’engata. ‘Io, ko e taloni ‘o e Lami mo e taloni ‘o e ‘Otua – ko e taloni pe ‘e taha. Ko e taloni tatau pe. Pea ‘oku lotu e me’amo’ui kotoa pe ki he lami ko eni, mo fai ai pe ‘enau fakahikihiki. Me’a pe ‘e taha ‘oku toe ke nau hiva mai ’aki, ke nau pehee mai, ‘Emeni – ‘o hange ko ia ‘oku ha he veesi 14.
‘Oku fiema’u ke tau vakai ki he potu tohi ni, ki he me’a ‘oku muimui mai pea pehee ki he me’a ko ia kuo hoko. ‘Io, ‘a e me’a ‘oku muimui mai hili hono to’o e ngaahi sila ‘e 6, pea mo e vavakovi ‘i he kuonga faka’osi pea pehee ki he ngaahi fakamamahi.
‘A kinautolu ‘oku fanongo, ‘e lava pe ke nau puke e ‘ata ‘o e kuonga ko eni, he ko e tala ‘oku fai; ‘oku ‘ikai ngata pe he tau-heka-hoosi mo e fakamamahi – ka ‘oku hoko atu foki ki he hoko mai ‘a e fakamo’ui mo e fiefia lahi.
Ko e fakamanatu mai kiate kitautolu, he kuo ikuna’i ‘a fa’itoka pea mo hetesi; pea ‘oku ha mai ‘i he kaha’u, ‘a e talupite ‘o loto Hevani.
Ko e me’a ‘oku tuku mai kiate kitaua, ke ta kau ange ki he fu’u kakai toko lahi ko eni; ‘i he lotu mo e fakahikihiki’i ‘o e Lami.