Hepelu 11:1-3,8-16
Ko e ‘ipiseli ko eni ki he kakai Hepelu, ‘oku ‘ikai fakapapau’i ‘a e toko taha na’a ne fa’u; ka ‘oku mahino ‘aupito mei he ‘ipiseli ni, ‘a e me’a ne tuku loto’i mo mo’ui’aki ‘e he taha fa’u tohi. Ko e toko taha ni foki ‘oku mahino, ne ‘i ai ‘ene ‘ilo ki he kuohili pea mo e tu’unga lolotonga ‘o e kakai Hepelu. Haa ia he’ene ngaahi fakafe’iloaki mo e poupou ki he mo’ui faka-kalisitiane ‘a e si’i kakai ko eni.
Ko e vahe foki ko eni, ‘oku hange ne talateu mai ki ai e konga kimui ‘o e vahe 10. ‘I he’ene tapa mai fekau’aki mo e mo’ui ‘i he tui. Pea ‘oku feinga e taha fa’u tohi heni, ke mahino lelei ki si’i kainga Hepelu, ko e tui pe te tau lava ai. He ko ia pe me’a ne fononga mai ‘aki ‘e he kau to’a ‘o e fuakava motu’a. Pea koe’uhi ne hoko e tui ‘o lava me’a ai e kakai ko ia (‘i he kuohili), ‘oku kei malava ke kei lava me’a pe 'a e tui 'i he lolotonga ni.
‘I he talateu nounou ‘o e vahe ko eni, ‘oku hanga ai ‘e he taha fa’u tohi ‘o tuku mai ha ngaahi tefito’i fakakaukau; ko e natula maheni ‘o e tui, mo e langilangi ‘oku oo fakataha mo e tui, pea mo e founga ‘oku malava ‘e he tui ke faka’aa hotau mata (faka’atamai mo fakalaumalie).
He ‘oku hanga ‘e he tui ‘o fakasino, fakamo’oni’i mo fakapapau’i e ‘amanekina. Pea ko e langilangi ee ‘o e tui, ne ha sino he fuakava motu’a. ‘A e ngaahi ongoongo lelei ‘oku talatalanoa ki ai e kau matu’a ‘o e kuonga mu’a. Pea ko e ongoongo lelei ko ia, ko e hoko ‘enau tui ko e fakahoifua ki he ‘Otua. ‘Io, ko e tui ee ‘oku ne ‘omi ai e mahino, ne ngaohi ‘e he ‘Otua e ‘univeesi.
Ko e ‘uluaki me’a ne fakamamafa’i mai ‘e he taha fa’u tohi ni, ‘a e malava ‘e he tui ke ‘omi ha ngaahi lelei mei he ‘Otua (‘o kau ai ‘a e lelei’ia mai ‘a e ‘Otua ‘iate kinautolu).
Ko ‘Epeli ee, ‘a ia ‘oku ne fakafofonga’i mai ‘a e kau mo’ui faitotonu; ‘o hoko ai ‘ene fai feilaulau ‘o hoifua ki ai ‘a e ‘Otua.
Ko ‘Inoke, ‘oku ne fakafofonga’i mai e tapuaki ‘o e fakahoifua ‘Otua. Ko e tangata na’a ne fononga mo e ‘Eiki, ‘i he tui. ‘Io, ne hiki pe ‘a ‘Inoke mei mamani ‘o ‘ikai mamata ia ki he mate!
Fefe ‘a Noa? ‘A ia na’a ne hoko ko e ‘ea ‘o e ma’oni’oni fakatui. ‘A e hoko e tui ‘a Noa, neongo e ngaahi fakafe’atungia, ‘o mo’ui ai ‘a hono fale. ‘Io, mo’ui e sino mo e laumalie! He kuo mole atu e mamani ko ee, ka e hoko mai ‘a Noa mo hono famili ki he mamani fo’ou. Pea ‘oku pehee pe ‘a e fakaloto lahi e tangata fa’u tohi ni, ‘a e malava ‘e he tui ‘o fakaa’u ‘etau ‘amanaki; ko e ‘amanaki ki ha maama ‘oku fo’ou (ko e Selusalema fakalangi).
Ko ‘Epalahame ee pea mo Sela. Kuo hoko ai e ta’emalava ‘o malava, tu’unga pe ‘i he tui. ‘Ene hiki ki ha feitu’u (ne ‘ikai te ne ‘ilo ki ai), ka ko e fononga pe ‘i he tui; mo ‘ene nofo pe ‘o ‘amanaki ki he kolo ma’u tu’unga (‘a Hevani). ‘Io, ko e tui tatau pe na’a ne ‘ai e fakangatangata ‘a mamani ko e ta’efakangatangata. ‘O hoko ai ‘a Sela ko e fa’e ‘o ha tama. Pea hoko ai ‘a ‘Epalahame (‘io, ko e toulekeleka) ko e tamai ‘o ha laui to’utangata.
Kapau ko e tui ee ne lava me’a ai e kau to’a ‘o e fuakava motu’a, talamai ‘e he tangata fa’u ‘ipiseli ni, ‘oku kei malava pe he lolotonga ni. ‘Io, na’a mo e mate, ‘oku malava pe ‘e he tui ke fakamo’ui. Pea neongo ‘ene a’u ki ha taimi ‘oku hange ‘e mole e ‘amanaki, talamai ke ‘oua ‘e tu’atamaki – te ne mafai pe ho’o me’a!
Ka tau hange mu’a ko e kau ma’oni’oni ko ee, ‘enau mamata ki he fonua (‘oku haa mai) pea ‘ikai ai to e fie foki ki he fonua ne nau omi mei ai. ‘Io, ne tangi honau laumalie, ko ‘api ee! ko ‘api ee! Pea ko e kakai ko ia, ‘e ‘ikai maa e ‘Otua ke feohi mo kinautolu.