Saame 81:1,10-16
'Oku 'i ai 'a e tui ko e saame fakafeta'i eni, 'i he manatu melie ki he fakahaofi mo'ui kuo fai 'e he 'Otua. Ne fa'a ngaue'aki e saame ko eni, 'o tukufakaholo fakataha mai mo e ngaahi katoanga (feast of Tabernacles). Ko e fakaikiiki 'o e ngaahi katoanga 'e ma'u ia he ngahi potu tohi ko eni; Levitiko 23:33-36, 39-43 pea mo Teutalonome 16:13-15. 'I ai e ni'ihi, 'oku nau lau 'o pehee ko e tefito'i 'uhinga e saame 'a 'Esafe, 'oku fekau'aki mo e pasova ('o hange ko 'ene ha ko ia he veesi hono nima. Ka 'oku mahino mei he ngaahi uki mavava mo fiefia ia 'a 'Esafe, 'ene fe'unga tonu mo e ngaahi katoanga tapanekale. He 'oku uki heni 'e 'Esafe, ke fai ha katoanga fakafiefia; ke fakahaa'i 'aki e hounga'ia, 'i hono veteange e popula 'o 'Isileli mei 'Isipite. Pea 'oku ngaue'aki 'i heni 'e 'Esafe, ha ngaahi fakamo'oni mei he kuohili, 'e lava noa pe 'e he 'Otua 'o liliu e ngaahi mamahi mo e fakafe'atungia, 'okapau te nau talangofua kiate ia.
'Oku uki 'e 'Esafe 'i he veesi 'uluaki, ke fai 'e he kainga (kakai 'i 'Isileli) ha hiva mavava ki he 'Otua; he ko ia ia 'a honau malohinga.
'I he konga faka'osi 'o e saame ni, 'oku talanoa ai 'a 'Esafe ki he ha mai 'a e 'Eiki he ngaahi me'a kehekehe pe, 'o kau ai mo e lao na'a ne tuku mai kiate kinautolu. Pea na'a ne palomesi kiate kinautolu, kapau te nau tauhi e ngaahi tu'utu'uni ni, te ne fakaai 'enau ngaahi fiema'u ('o hange ko ia ko hono faka'ataa kinautolu mei 'Isipite). 'Io, ke 'oua na'a nau to e tauhi ki ha 'Otua kehe, ko ia toko taha pe - te ne lava ke fakaai 'enau ngaahi fiema'u.
Pehee 'e 'Esafe, kuo 'afio'i 'e Sihova 'enau ngaahi talangata'a. Pea kuo ne tuku pe, ke fai 'e he tangata taki taha ho'onautolu loto (neongo na'a ne 'afio'i pe, 'e 'auha ai e fa'ahinga ko ia).
Ka e fakamanatu mai 'e 'Esafe, ne 'i ai e palomesi 'a e 'Otua, te ne fakahaofi kinautolu kapau te nau fakaongo kiate IA. 'Io, te ne taa e ngaahi fili 'oku ene ki he'enau mo'ui, pea te ne foaki tapuaki (honi mo e mahoa'a) foki ma'a kinautolu 'oku talangofua mo fakaongo kiate ia.