Selemaia 32:1-3a, 6-15
Ko e tohi eni ne hiki 'e he Palofita ko Selemaia. 'Oku ha 'i he konga ki mu'a 'o e vahe ni, 'a hono lekooti 'e he Palofita ni e taimi ne hoko ai e ngaahi palofisai ni. Ko e taimi ko eni, ko hono 10 ta'u ia 'o e pule 'a Setekaia 'i Siuta, pea ko hono 18 ta'u ia e pule 'a Nepukanesa 'i Papilone. Ko e mahu'inga e tala taimi ko eni, he na'e 'i ai e palofisai 'a e Palofita ni, 'o kau ki he me'a 'oku hoko 'i he taimi ko eni.
'I he taimi ko eni, ne kapui 'e he pule'anga Papilone 'a Siuta. Pea ne tauhi pilisone 'a e Palofita ni 'i he mala'e 'o e kau ka'ate Siuta. Ko e 'uhinga 'o hono tauhi pilisone ko eni 'o Selemaia ('e Setekaia), he na'e palofisai 'a Selemaia 'e hoko ha kuonga pehee ni; 'e tuku 'a Setekaia mo e pule'anga Siuta ki he nima 'o Nepukanesa mo e pule'anga Papilone. Pea neongo 'e feinga 'a Setekaia mo Siuta ke fakafepaki, he'ikai pe lava ke nau hao ai mei he me'a kuo tala.
Lolotonga 'a e 'ohofi ko eni 'e Papilone 'a Siuta, ne a'u mai ai ha tangata ('a ia ko e tokokua'aki 'e Selemaia); 'o kole ki he Palofita ke ne fakatau honau konga 'api. Ka e te'eki ke a'u mai ia kia Selemaia, ne tomu'a fakaha eni 'e he 'Otua ki he Palofita. Kaekehe, ko e toko taha ko eni ko 'Anameli, 'a ia na'a ne 'a'ahi mai ki he pilisone kia Selemaia (hange ko ia ko 'eku lave ki mu'a). Pea ko e konga'api fakafamili ko eni 'oku tu'uaki fakatau kia Selemaia, 'oku tu'u ia 'i 'Anatoti. Ko e founga maheni pe eni ia mo ha'a Siu. Ka 'i ai ha taimi kuo 'amanaki ke mole ai ha konga 'api mei ha taha ma'u tofi'a, ko e me'a ke ne fai ko hono kumi ha taha 'i he famili ke ne fakatau (koe'uhi ke 'oua na'a mole mei he famili 'a e 'api ko ia). Pea 'oku mahino, kuo kapui 'e Papilone ia 'a 'Atatoti 'i he taimi ko eni. Mahalo pe ne fiema'u 'e 'Anameli ha seniti ki he'enau nofo, he kuo kapui kinautolu 'e he fili (Papilone). Pea ko hai ia ha taha, te ne fakatau ha koloa (pe konga 'api), hili ko ia kuo fa'ao ia 'e ha taha kehe? Kaekehe, ne fakaha 'e he 'Otua e me'a ni kia Selemia, pea ne falala 'a Selemaia ko e me'a totonu pe eni ia ke fai. Fakatau leva 'e Selemaia 'a e konga 'api ko eni 'aki e sikeli siliva 'e 17. 'Omi leva 'e Selemaia ha kau fakamo'oni pea hiki mo e tohi momoi 'o fakamo'oni ki ai pea sila'i. Hili ko ia pea ne fekau ke 'ave e tatau ne sila'i 'o tuku 'i ha ipu 'umea (ke tolonga fuoloa), pea 'ave 'a e tatau 'e taha 'o tuku ke nau ngaue'aki. 'Oku mahino heni 'a e falala 'a Selemaia, 'e 'i ai e taimi 'e tau'ataina ai 'a Siuta mei Papilone; pea 'i he'enau foki, 'e to e ma'u pe honau tofi'a. 'Io, 'a e ngaahi fale mo e ngaahi mala'e mo e ngaahi ngoue vaine, 'e to e fakatau mai ia 'e he kakai 'Isileli ma'a honau fonua.