Selemaia 29:1, 4-7
Ko eni 'a e 'uluaki tohi 'a Selemaia ki he kau nofo popula 'i Papilone.
'I he taimi ko eni, ne 'i ai e kau palofita ne nau palofisai 'o pehee: 'e vave ni pe hono fakatau'ataina'i kinautolu mei he nofo popula. Pea nofo ai si'i kainga ko eni, mo e 'amanaki ki he 'aho ko ia ne tala 'e he kau palofita. Lolotonga eni mo e a'u atu ki he kau popula ni, 'a e tohi ko eni 'a Selemaia; mo 'ene na'ina'i ke 'oua na'a nau tali 'a e palofisai 'a e kau palofita loi. He ko eni 'a e folofola 'a Sihova: mou langa fale, to ngoue tapu, fa'u famili fo'ou pea hufia 'a e pule'anga 'oku mou nofo popula ai. 'Io, ke mou mamahi'i e tu'umalie 'o e fonua ko ia. He ko 'ene tu'umalie, ko ho'omou tu'umalie ia.
'Oku ha mahino mei he tohi ko eni, 'a e fepaki 'a Selemaia mo e kau palofita ko ee. Tala 'e he kau palofita ko ee, 'e vave mai honau fakatau'ataina; kae talamai 'e Selemaia, mou langa fale hena mo to ngoue tapu.
Ko e langa fale mo e to ngoue tapu, 'oku ne tala taimi ki he nofo 'oku fai. He ko e langa fale, ko hono fokotu'u ha nofo'anga 'a ia 'e tolonga atu 'i ha ngaahi ta'u. 'Ikai talamai ia ke nau fokotu'u teniti, ke pehee ko e nofo fakataimi pe. Talamai ia ke langa fale. Ko e to ngoue tapu, ko hono to ha ngoue 'e tokoni ki he'enau nofo. Pea ko e ngoue ko eni 'e tokoni ia ki he'enau ma'u me'atokoni faka'aho ('o 'ikai 'i ha 'aho pe 3, ka 'i he ngaahi mahina pe ko e ngaahi ta'u ka hoko mai). Ko e faka'ilonga 'o e nofo ka fuoloa. 'Ikai ia ko ia pe, ka ne to e tala ke ma'u famili foki mo 'enau fanau.
'A ia ko 'enau 'amanaki ko ia 'e fakafoki kinautolu ki honau fonua tupu'anga 'i ha taimi vave mai, 'oku hange pe ia ha 'ata'i maa. Ko ha 'ata pe 'o ha me'a 'oku 'ikai mo'oni. Ka ke nau nofo hifo 'o ngaue'i 'a e fonua kuo tuku kinautolu ki ai 'e he 'Otua. Ke nau mamahi'i 'a e me'a kotoa pe, 'a ia 'e kau lelei ki he fonua ko ia. Ha me'a pe 'e kau ki he nofo melino, ko e me'a ia ke nau mamahi'i. Ha me'a pe 'e kau ki he tu'umalie 'a e fonua, ko e me'a ia ke mamahi'i. 'Io, ke 'osi honau ivi hono ngaue'i 'a e fonua 'o e kehe.
Ka tau fehu'i pe ko e ha nai hono 'uhinga?
He na'e 'i ai honau faingamalie, kae 'ikai te nau faka'aonga'i. Ne taki kinautolu 'e he 'Otua mei 'Isipite, pea fafanga kinautolu mei langi. Ne tofa hala ma'a kinautolu 'e he 'Otua, 'i he tahi kulokula mo e vaitafe Siotani. Ne 'i ai honau ngaahi faingamalie, ka e 'ikai ngaue lelei'aki. Ne nau tuku pe honau 'Otua, ka nau lotu kinautolu ki he ngaahi 'Otua mate. Ne nau tuku pe honau 'Otua, ka nau fai pe ki honau loto. Ne nau tuku pe honau 'Otua, 'o nau fakaehaua'i 'a e vaivai mo e masiva. Pea mo'oni pe hiva saame, ko e ha kuo tautau ai 'a e ha'ape ia 'i he uilou? Ko e ha kuo 'ikai fai ai ha hiva? Kuo mole 'a e ifo ia e nofo mamani, pea 'ikai to e oli ha me'a ia.
Ko eni pe hota faingamalie. Ko eni pe 'a e taimi. 'Oku ne tu'u ia 'i he matapa 'o tukituki. 'Ilonga 'a ia te ne tali 'a e 'Eiki, te ne ma'u ha nonga mo ha malolo 'i hono loto. Neongo e lahi e ngaahi faingata'a, ka 'oku nonga pe 'a e loto, 'ia Sisu Kalaisi. 'Io, he 'oku 'ia Kalaisi 'a e hakeaki'i 'a e vaivai.