2 Timote 2:8-15

'I he ngaahi uike kuohili, ne tau ako ai 'o 'ilo e felave'i 'a Paula mo Timote. 'Ikai ia ko ia pe, ka 'oku ha mahino foki 'a e me'a 'oku uho'aki 'e Paula. Pea ko e me'a ia 'oku feinga ki ai 'a Paula, ke ma'u 'e hono foha (faka-kalisitiane) ko eni ko Timote 'a e uho tatau. 'Io, 'a e uho'aki 'a Kalaisi Sisu.

Ko e lea ko ia ko e uho, 'oku angamaheni hono ngaue'aki ki he 'akau (plants). Pea 'oku mea'i 'e kinautolu 'i he mala'e 'o e ngoue (agriculture), ko e ngoue pe 'akau kotoa pe 'oku 'i ai hono uho. Pea 'i he uho, ha ongo me'a lalahi 'e 2. Ko e taha, ko ha halanga me'akai. 'A ia ko hono fatongia, ko e fetuku e me'atokoni mei he lau ki he toenga 'o e fu'u 'akau. Pea ko e taha, ko e halanga vai. 'A ia ko hono fatongia 'o'ona, ko e fetuku e vai mei he kelekele ki he lau ( 'a ia 'e tokoni ai ki hono ngaohi e me'atokoni 'o e fu'u 'akau ko ia). Ka mo'ui lelei 'a e uho, 'e mo'ui lelei 'a e fu'u 'akau. Pea 'oku ha mei he lau, 'a e tukunga 'oku 'i ai e mo'ui 'o e fu'u 'akau ko ia.

Ko e kosipeli 'a Sisu Kalaisi, 'a e uho 'o e mo'ui 'a Paula. Pea 'oku toutou fakamanatu heni 'e Paula kia Timote, ke manatu ma'u pe ki he UHO 'o e mo'ui 'a e kalisitiane, 'a KALAISI. He ka uho'aki 'a Kalaisi, pea 'e longomo'ui e me'a kotoa pe. 'Io, 'e lava ai ke ngaohi e me'atokoni ma'a hotau laumalie, 'i he 'ofa mo e kelesi 'oku tafe mai mei he laumalie 'o e 'Eiki. Ma'u maama ai hotau ngaahi 'atamai, pea nonga ai 'a e loto 'oku hoha'a.

'Io, neongo 'oku ma'u seini 'a Paula 'i pilisone; ka 'oku nonga pe ia. He taumaia, 'oku ma'u seini ai 'a e folofola ia 'a e 'Otua. Ka 'i hono loto, 'a ia 'oku ne uho'aki 'a Kalaisi, 'oku 'i ai e kataki mamahi. 'Io, he na'e kataki'i pehee pe 'e Kalaisi 'a 'etau ngaahi hia. Ko e fa'ahinga kataki 'oku tu'amelie ki he taunga 'i he fu'u telie. 'Io, he ko e hili 'a e la'ala'aa, 'e to mai 'a e 'uha. Hili 'a e mamahi, 'e 'i ai ha fu'u fiefia.

Kapau te tau mate mo IA, te tau mo'ui mo IA.

Kapau te tau kataki, te tau kau fakataha mo IA 'i hono langilangi.

Hange nai eni ha faka'ilonga 'o kinautolu 'e lava ki he langi. He ko e hoko mai e ta 'a e tapu, pea 'eke mai pe ko 'ete mate 'i he 'Eiki. Ko e mate 'i he 'Eiki, 'a kinautolu ne uho'aki 'a Kalaisi. 'A kinautolu, ne nau kataki mamahi koe'uhi ko e kosipeli 'a Sisu Kalaisi.

Ka 'oku fefe 'a e faka'ilonga 'o ha mo'ui, 'oku 'ikai uho'aki 'a Kalaisi?

  • Ko e mo'ui fakafisinga 'Eiki. 'Oku ne faka'ikai'i, 'oku 'ikai ha 'Otua mo'ui.
  • Ko ha mo'ui 'oku mole mei ai 'a e tui. Ko e tui ki he 'Eiki ko Sisu Kalaisi.

Timote, ke ke fakaha koe ki he 'Otua 'oku ke tu'u mo e lau. Ko e tangata ngaue 'oku 'ikai ma. Pea ko ho fatongia, ko e tofa tonu 'ae folofola 'o e mo'oni.

Tu'u mo e lau fefe? 'Ilonga pe 'akau 'oku mo'ui lelei hono uho, 'e kei tu'u mo e lau. Pehee tofu pe mo kinautolu 'oku 'ia Kalaisi. 'Oku nau ha ki he 'Otua, ko ha kakai 'oku mo'ui'aki 'a Kalaisi. Ko ha kakai 'oku kei ma'u ivi. Ko ha kakai 'oku tu'u totonu pe 'o malohi. 'Io, hange ko e ma'u malohi 'a e 'akau mei he la'aa, 'e pehee pe 'a e ma'u malohi 'a e tangata mei he 'Otua.

Ko e tangata ngaue 'oku 'ikai maa; ko ha taha 'oku ne fai pe 'a e fatongia 'oku totonu ke ne fai. Pea ko e taha ko ia 'oku 'ikai te ne maa, he 'oku 'ikai 'uli 'ene ngaue totonu 'oku fai. 'Ilonga 'a kinautolu 'oku faihala, 'oku nau maa. 'Ikai ngata pe he'enau maa ki honau kaunga fononga, ka te nau maa foki 'i he 'ao 'o e 'Otua. 'E fefe 'etau hoko ko e tangata ngaue 'oku 'ikai maa? Uho'aki 'a Kalaisi. Mo'ui'aki 'a Kalaisi.

Ko e tofa tonu, ko hono vahe'i/ngaohi ha fononga'anga 'oku hangatonu. Pea 'oku 'ilo'i e fononga'anga hangatonu, he halanga fononga nounou. He 'oku nounou ange 'a e lele hangatonu, 'i he lele takai. 'Ouae fakakikihi 'i he lea, he ko e halanga fononga ia 'oku loloa. 'Ikai ngata pe 'i he'ene fakahela, ka 'oku mole ai 'a e taimi. Tofa tonu pe 'a e folofola 'a e 'Eiki. Tofa pe ke hangatonu. Hala tau he mate pe mo'ui, tofa pe 'e koe ia ke totonu. Malanga'i 'a e folofola 'a e 'Eiki, neongo 'ene fepaki mo e loto 'o e kakai. Tala pe ke nau 'ilo, ko Sisu pe 'a e hala mo e mo'oni mo e mo'ui.

He 'oku mo'oni 'a e punake ko ee:

 

Ne u fiu au he feinga, ke u a'u tonu ki he mo'ui

Feinga 'i he ngaue lelei, 'ou tu'u'aki 'a hoku ivi.

Lau ai 'eku tupu lotu, mo e lelei na'aku tu'uaki

Ka he'ikai pe lava 'e ha taha 'o ngaue'i hono fakamo'ui.


Ke tau fou he hala totonu. Tali 'a Sisu Kalaisi ki he'eta mo'ui.