Hapakuki 1:1-4
‘Oku fihitu’u ‘a e me’a ‘oku hoko, ki he fakakaukau ‘a e Palofita ko eni ko Hapakuki. Ko e faikovi mo e fakaehaua, ‘oku ‘ikai pe fai ki ai ha tautea ia. Kuo faka’au pe taimi mo e to e fakautuutu ange ‘a e faihala mo e fakaehaua ‘i Siuta, pea hange nai he’ikai pe to e ‘osi ia. Hanga hake e Palofita ni ‘o fakahoko ki he ‘Otua ha launga. Ko e ha ‘oku ‘ikai ai te ke ngaue mai ai ki he kau faihala? Folofola mai ‘a e ‘Otua, ko eni ‘oku lolotonga fai e ngaue ki ai; pea ‘e tautea’i ‘a Siuta ‘aki ‘a Papilone. ‘I he ongo mai ‘a e folofola ko eni ‘a e ‘Otua, hange nai ne to e fihi ange ‘a e ngaahi me’a ia ‘oku hoko, ki he fakakaukau ‘a Hapakuki. Fakatau folofola ‘a e Palofita ni ‘o pehee, ‘Eiki – ko e ha kuo ‘omi ai ‘a e kau lotu ‘otua mate ‘o Papilone, ke fakamaau ‘a Siuta?
‘I he konga ‘uluaki ‘o e lesoni ko eni, ‘oku mahino mei ai ‘a e fifili ne fai ‘e Hapakuki. Pea hange ko ia ‘oku talateu’aki ‘e he vahe 1, ko e ‘kavenga’ eni ne mamata ki ai ‘a e Palofita ni. Malie ‘a e tala ‘oku fai ‘e he Palofita, he ko e kavenga, ko e me’a ke fua (pe ha’amo). Pea ko e kavenga kotoa pe, ‘oku ‘i ai hono kanoloto. Pea ko e ngaahi me’a ‘oku kanoloto ‘aki e kavenga, ko ia ia ‘oku ne ‘omi e mamafa ‘o e kavenga taki taha. Ko e kavenga ko eni ne vakai ki ai e Palofita, ‘oku ‘i ai hono kanoloto. Kuo lahi e faikovi mo e fakaehaua, lahi mo e fakamaau kaakaa; pea kuo mamafa fau mo e tautea (pe ko e kavenga) kuo tuku mai ‘e he ‘Otua.
Ko e fifili ne fai ‘e Hapakuki, ne hange nai ‘oku konga lalahi ‘e 2. ‘Uluaki, ne fifili e Palofita ni pe ko e ha koaa ‘oku ‘ikai tokanga mai ai ‘a e ‘Otua ia. Ko e ha ‘oku ‘ikai to e fanongo mai ai ia? Ko e ua, na’a ne fifili pe ko e ha kuo ongo noa ai ki he ‘Otua ‘a e ui tokoni ‘oku fai.
“Ko futu.....” ko e lea ‘o e fiu tatali. Ko e lea ‘o e fiu ‘a fai. Ko e lea ‘o e toutou kole mo kole, kae ‘ikai pe ‘i ai ha tali. ‘Io, ‘ikai ngata pe he toutou tangi ‘a e Palofita ‘i he’ene kole tokoni, ka ko e fai hala mo e fakaehaua ‘oku fakautuutu ange hono fai. Ko eni e! Fakapo e! Kae ‘ikai te ke fakahaofi.
Lahi faufaua e fai angahala, kae hange ne ‘ikai tokanga mai ‘a e ‘Otua ia ki ai. Pehee ai ‘e Hapakuki, ko e ha ‘oku ke tuku ai ke u sio ki he kovi? Pea ke mo’u vakaia ‘e koe ‘a e fakamamahi? Hange nai ki he Palofita ni, ko e vakai ‘a e tangata ki he faihala pea ‘oku ne ongo’i mafasia ai. Pea kapau ‘oku mafasia ia ko e tangata, huanoa ka vakai mai ‘a e ma’oni’oni ki he faihala ‘oku fai. Kae hange ‘oku fihi kia Hapakuki, he ‘oku vakai mai ‘a e ‘Eiki ia ki he fakamamahi ‘oku fai – pea ‘ikai tokanga ia ke fai ki ai ha ngaue.
Ko e fakaloloma taha ‘o e ngaahi angahala ‘a Siuta, ko hono li’aki e lao ‘a Sihova. Kuo fakamaluuluu ‘a e lao, ‘o ‘ikai lava ‘e he lao ke fai hono fatongia; ko hono tataki ‘a e ta’efaitotonu ki he mo’oni. Ka kuo tukunoa’i ‘e Siuta ia ‘a e mo’oni mo e totonu. ‘Io, ‘a e Lao ‘a Sihova. Pea ‘i he’ene pehee, ‘ikai ai tautea’i e faihala mo e fakamalohi. Pea ko faitotonu mo tukuhausia, kuo loka’i kinautolu ‘i ha pilisone kuo mole hono kii. ‘Io, ko e fakamaau kuo hoko pe ia ko e koto mio’i. He kuo mio’i e totonu ‘o hala, pea mio’i e hala ia ko e mo’oni.