'Aisea 49:1-7
Ko e Misiona ‘a e Sevaniti.
‘I he lesoni ko eni, ‘oku ua ‘a hono vahevahe. Pea ‘oku tokanga ‘a e vahe ‘uluaki ki he misiona (pe ko e tefito’i fatongia) ‘a e sevaniti, ki he senitaile.
Ka ko hai ko aa ‘a e sevaniti?
Kapau te tau vakai ki he ‘uluaki veesi ‘e 5, ‘oku nau talanoa ai ki he toko taha kuo ui ke ne hoko ko e sevaniti. Hange ko ha ‘Eiki, ‘i hono uki e ngaahi motu mo e ngaahi pule’anga ke nau fakaongo kiate ia. Pea kuo ngaohi e ngutu ‘o e sevaniti ni, ke hange ko e heleta masila. ‘Io, ko ha me’a ke ne faka’auha ‘a e talangata’a. Pea ‘oku ne hange foki ko ha ngahau kuo oloolo, ‘o tuku fufu ‘iate ia ‘a e faka’ofo’ofa ‘a e ‘Eiki.
Pea ‘oku mo’oni pe ‘a e tala ‘oku fai, he kuo teu’i ha taha mei loto-tatau, ke ne hifo mo e ‘ilo loloto, pea hoko mai mo ia ha mafai ‘oku ‘ikai fakangatangata. ‘Io, ko ha Misaia ma’ae kakai ‘Isileli. Pea ko hono tefito’i fatongia, ko hono fakakakato ‘a e me’a ne tonounou ai ‘a ‘Isileli. ‘Io, pea te ne hoko ia ko e hiki hake ‘a e fonua kotoa.
Ko e ngaue te ne fai, ‘e hoko ko e koto kavenga kiate ia. Pea neongo ‘a e mafatukituki ‘a hono ngaahi faingata’a, ka ‘oku tu’u ai pe ‘ene falala, ‘e ma’u hono pale mei he ‘Otua.
‘Io, ko e hako ee ‘o Sekope mo e fanau ‘o ‘Isileli, kuo nau hee kotoa pe mei he ‘Eiki. Pea ko e hoko mai ‘a e Misaia, te ne fakafoki ‘a e si’i fanau ni ki he ‘Otua. ‘Io, te ne kau ia mo e ‘Eiki, ko hono malohinga. Pea te ne hoko foki ko ha maama ma’ae senitaile.
Ko e taha kuo ui ma’ae kakai ‘Isileli. Pea ma’u koloa ai mo e senitaile. ‘Io, ‘i he maama mo e ngaahi lelei te ne hoko mai mo ia, ‘e hoko ko e koto mo’ui ma’a kinautolu te nau fanongo pea tui.
‘I hono ua ‘o e konga, ‘oku ha mei ai ‘a e palomesi ‘a e ‘Otua ki he’ene sevaniti. Neongo ‘e taliteke’i ia pea fakalili’a ki ai ‘a hono kakai, ka ‘e hoko pe ‘o kakato ‘a ‘ene misiona ki he senitaile kotoa.
‘Io, ko e ngaahi Tu’i mo e kau Hou’eiki, te nau punou kiate ia. He ko e taha ia kuo fili ‘e he ‘Otua. ‘Io, ‘i he ‘uluaki ha’ele mai ‘a e Misaia, ne ta’etoka’i pea fakalili’a ki ai ‘a hono kakai. Ka ‘i he ha’ele hono ua, ‘e punou ki ai ‘a e me’a mo’ui kotoa pe; mo e ma’u mafai kotoa pe.