Kolose 1:11-20
Ko e tohi eni ne fa’u ‘e Paula, ki he kainga lotu na’e ‘i Kolose. Ko Kolose ko e kolo ia ‘i ‘Esia Minu, fakahahake ‘o ‘Efeso. Ne ‘ikai kau ‘a Paula ‘i hono fokotu’u e siasi ko eni ‘i Kolose, ka na’a ne ongo’i pe ‘oku ‘i ai hono fatongia ki he kainga lotu ko eni. ‘Ilo ‘e Paula ‘a e ngaahi tokateline hala ‘o e lotu, kuo huu mai ki he lotu faka-kalisitiane. Kuo ‘i ai e tokateline, ‘a ‘oku nau taku tokua – ‘e toki lava ke te ‘ilo’i ‘a e ‘Otua mo lava hono fakamo’ui kita, ‘okapau te te lotu ki he kau ma’u mafai ma’olunga fakalaumalie. ‘ikai ngata ai, kuo ‘i ai foki mo e kau faiako kuo nau tala ‘o pehee; kuopau pe ke te fou he ngaahi ouau pau kae toki lava hoto fakamo’ui. Pea ‘oku kau ‘i he ngaahi ouau ko eni ‘a kamu mo e ngaahi tapu ‘i he me’atokoni, mo e ngaahi me’a kehe pe.
Kia Paula, ko e ngaahi tokateline ko eni, ‘oku nau taki hee’i ‘a e kakai mei he lotu Kalisitiane. ‘Oku ‘ikai ma’u e fakamo’ui ‘i he lotu ki he kau ma’u mafai. ‘Oku ‘ikai ma’u e fakamo’ui ‘i hono tauhi e ngaahi ouau pe tukufakaholo. ‘Oku ‘ikai ma’u e fakamo’ui ‘i ha ngaue lelei, pe ko ha koloa ‘oku te foaki. Ka ‘oku ma’u pe fakamo’ui ‘i he’ete TUI pe ki he ‘Eiki ko Sisu Kalaisi.
Mo’oni e talaloto ‘a e tangata ko ee:
He’ikai hao ha taha, mei he vanu ‘o e angahala. Kapau te ne feinga tu’unga’a, ‘i hono ivi fakaetangata. ‘Oku taha pe ‘a e hao’anga, pea taha pe ‘a e hala. Ko e ta’ata’a tapu ‘a e lami ‘ave hia, ‘a ia ne tafe mei he fanautama-‘a-tangata.
Ko e ‘ilo ‘a e finangalo ‘o e ‘Otua, ‘oku ne ‘omi ha malohi ki he mo’ui ‘a e laumalie ‘o e tangata. He ko e finangalo ‘o e ‘Otua, ‘oku ‘ilo pe ia ‘e kinautolu ‘oku TUI. Pea ‘oku mei he ivi ko ia, ‘oku lava ai ke kataki fiefia ‘a e me’a kotoa pe. ‘Io, neongo ‘a e faingata’a ne ‘ia Siope, ka na’a ne kataki fiefia pe, koe’uhi ko ‘ene TUI. Ko eni pe ia ‘oku fekuki mo Paula. Neongo hono ngaohikovia ia, ka ‘oku ne kataki fiefia pe, ‘i he me’a kotoa pe. Ko e ha nai hono ‘uhinga? Koe’uhi ko TUI. Ko e fa’ahinga kataki, neongo pe ‘a e faingata’a mo e mamahi ‘oku te fetaulaki mo ia, ka ‘i hoto loto ‘oku ‘i ai e fiefia. Pea ‘i he fiefia ko ia, ‘oku ‘uhinga ki ai ‘a Paula, ‘o tau tuku ai ha fakamalo ki he Tamai fakalangi. He ‘oku mei he Tamai, e ngaahi me’a’ofa fungani kotoa pe.
Fakamanatu heni ‘e Paula ki Kolose, ko e kalisitiane ke fiefia ma’u pe. Pea mei he fiefia, ‘oku ‘i ai e lotu hounga’ia mo e loto fakafetai’ia. Talamai ko e fiefia ko e taha ia he fua ‘o e laumalie ma’oni’oni. He ‘oku makatu’unga e fiefia ‘a e tangata, ‘i he ‘omi ‘e Sihova ‘a e ‘amanaki lelei ki hotau fa’ahinga. Kuo ‘omi ‘e Sihova ‘ia Kalaisi Sisu, ke tau ma’u ai ‘a e mo’ui. Ko ha fa’ahinga ne sio pe ki fa’itoka, ka kuo hoko mai hotau ‘amanaki’anga, pea ‘oku ne talamai ke tau omi ‘o ma’u ‘a e mo’ui, pea ke ma’u ‘o lahi ‘aupito.
‘Ia Kalaisi ....... Kalaisi pe ‘e taha, ‘oku ma’u ai ‘e fakamolemole angahala. ‘Ikai ‘i ha ngaue lelei. ‘Ikai ‘i ha ngaue na’a ta fai. ‘Ikai ko ha me’a tukufakaholo. Ka ko e ta’ata’a tapu ‘a e lami, ‘a Sisu Kalaisi. Ko e ta’ata’a pe ko ia, ‘oku ma’u ai ‘a e fakamolemole angahala.