Saame 52
Ko e saame eni 'a Tevita, 'i he'ene tokanga ki he founga kaakaa mo 'ikai falala'anga, 'a e tangata 'Itomi ko eni ko Toeki. Pea ko e saame ko eni, 'oku ne talanoa mo fakamatala'i mai ai e natula mo e 'ulungaanga 'o ha tangata 'oku hange ko Toeki.
Ko Tevita ko e tangata tui/falala 'Otua, pea 'oku ne fakatauhoa e me'a na'e 'i hono loto mo hono laumalie ki he me'a na'e 'i he loto mo e laumalie 'o e tangata 'Itomi ko eni.
'Oku konga lalahi 'e ua e saame ko eni:
- Ko hono faka'auha e tangata kaakaaa/'ikai falala'anga.
- Ko e iku'anga 'o e tangata tui 'Otua.
Konga 1 (v.1-7)
'Oku hanga heni 'e Tevita 'o fakahaa'i mai e natula 'o e tangata kaakaa mo 'ikai falala'anga. Pea 'oku ne tala fakapatonu pe ki he tangata ko eni 'ene me'a 'oku fai. He 'oku ofo 'a Tevita ia he polepole 'a e tangata ko eni 'i he'ene fai kovi. Hili ko ia, 'oku 'ilo lelei pe 'e he tangata, 'oku 'ikai fakahoifua 'ene me'a 'oku fai ki he 'Otua.
Pehee 'e Tevita ko e tangata ko eni, 'oku masila hono 'elelo 'o hange ha tele. He ko e ha pe me'a 'oku ne lea'aki, 'oku hoko ia ko e faka'auha mo e maumau ki he kakai. 'Io, pea 'oku ne manako foki ke nofo he nofo'anga 'o ha'a manuki mo fou he hala 'o e faka-'Otua mate, pea 'ofa foki kiate kinautolu 'oku fai kovi.
Koe'uhi ko e to'onga kovi ko eni, pea 'oku 'amanaki leva 'a Tevita 'e hoko mai 'a e 'Otua 'o ta'aki 'a e fa'ahinga pehee, mei he fonua 'o e mo'ui. 'Io, ko e kakai ko ia 'oku ha'u ki ai 'a mate ke 'ave; pea ko e 'ave ko ia, ko hono 'ave ia kinautolu mei he mo'ui 'o ta'engata.
Kae pehee 'e Tevita, ka ko kinautolu 'oku faitotonu; te nau ma'u ha fu'u fiefia. Pea te nau sio mata ki he kakai 'ikai falala 'Otua, 'i hono to'o kinautolu mei he fonua 'o e mo'ui, pea mo e ngaahi me'a 'e hoko kiate kinautolu.
Konga 2 (v.8-9)
'I hono fakatauhoa hangtonu 'e Tevita e ongo to'onga mo'ui ('ikai tui 'Otua mo e tui 'Otua), ne hanga heni 'e Tevita 'o 'omi tu'unga 'oku ne ma'u, tupu pe mei he'ene falala kakato ki he 'Eiki.
'Oku ne ngaue 'aki heni e fakataataa 'o e 'olive lanumata; ko e faka'ilonga 'o ha me'a 'oku mo'ui mo ha me'a 'oku tupu. Pea ko 'ene mo'ui, mo 'ene tupu 'a e fu'u 'olive; tu'unga pe 'i he'ene nofo he malumalu 'o hono tauhi, ko e 'Otua (lau Hosea 14:6). 'Io, ko kinautolu 'a e fa'ahinga faikovi 'e ta'aki fu'u mo e aka (veesi 5); ka ko ia 'oku falala ki he 'Otua, te nau mo'ui, tupu mo matala (saame 1:3).
Pea ko e 'uhinga ia ne malohi ai e tu'u 'a Tevita, he ko e 'akau 'oku mo'ui, 'oku malohi hono aka. Pea ko e aka 'o e kakai pehee, ko e 'ofa 'ata'ataa pe 'a e 'Otua. Pea ko e 'uhinga ia 'oku pole ai pe 'e Tevita ia, te ne nofo ai 'o ta'engata. 'Io, 'i he 'ofa 'a e 'Otua. Pea 'i he'ene nofo ai, te ne fai ai pe hono fakamalo'ia'i mo fakahikihiki'i 'a e 'Otua; koe'uhi ko e 'ofa 'aufuato kuo ne fai mai kiate ia.
Pea ko kinautolu 'a e kau ma'oni'oni te nau kau 'i hono hiki 'o e 'Otua mo fakalangilangi'i ia. He ko 'enau falala 'oku tu'u ma'u 'i he 'Otua, he 'oku tolonga 'o ta'engata 'ene 'alo'ofa.