'Emosi 8:1-12
Visone:
Ko hono tu’o fa eni malo, ‘a e ‘a’ahi mai ‘a e ‘Eiki ‘i ha visone kia ‘Emosi. ‘I he’ene ha mai ko eni, na’a ne ‘eke kia ‘Emosi ke ne talaange e me’a ‘oku ne mamata ki ai. Ka ‘i hono tali ‘e ‘Emosi ko ha kato fua’i ‘akau kuo momoho, ne pehee leva ‘e he ‘Otua kiate ia: kuo hoko mai e taimi faka’osi ki he kakai ‘Isileli, pea ‘e ‘ikai toe lakai.
‘Oku maheni pe mo kitautolu hono kotoa e momoho ko eni ‘oku lau ki ai e folofola. Pea ‘oku mahino e felave’i e momoho mo e taimi faka’osi, ‘i he’ene ha he visone ko eni ‘a ‘Emosi. He ko e momoho ‘oku ne talamai e ‘a e fa’ahi ta’u ‘oku ne ‘i ai, ko e fa’ahi ta’u mafana. Pea ko e fa’ahi ta’u eni ‘oku anga maheni mo ha’a fa’a ‘o tokanga; ko e fa’ahi ta’u ‘o hono fakamavahe’i ‘o e fua (fua’i’akau) mei he fu’u ‘akau. Pea ‘ikai ngata ai, ka ‘oku mahino mei he tukunga ‘oku ‘i ai e fo’i ‘akau – ‘oku nounou e taimi ‘e ‘aonga ai (momoho). ‘Io, he ‘oku hanga mai e kau tu’usi mei hee, ke fai hono tu’usi e ngaahi fua kuo taimi ke tanaki.
Ko ‘Isileli kuo hoko mai ki ai e taimi ututa’u. Pea kuo ‘a’ahi mai ‘a e tangata tauhi ngoue ke to’o e ngaahi fua, kuo kakato honau taimi. Pea ‘oku ‘ikai to e fakaoleole, pe to e tuku taimi; ka kuopau ke tanaki e ngaahi fua.
‘I he taimi ko ia ‘e hoko mai ai e taimi faka’osi, ko e ngaahi hiva ‘e liliu ko e tangi lau’aitu ‘i he temipale. Pea ko e ngaahi himi fiefia mo falala ‘Otua ‘e hoko ko e ngaahi tangilaulau mo fakaveiveiua (‘i he tui ‘Otua), koe’uhi ko e ala mai ‘a e tautea kiate kinautolu. Pea ko ‘enau mamahi mo lau’aitu, ‘e makatu’unga ia he lahi e kau pekia pea mo e ngaahi ‘anga’anga ‘oku mate holo ‘i he ngaahi feitu’u kehekehe. Pea koe’uhi ko e lahi e mate, he’ikai lava ke kei ma’u ha kakai ke tanu kinautolu; pe ko ha feitu’u ke tanu ai honau ngaahi sino. Pea ko e ngaahi ‘anga’anga ko ia ‘e keina kinautolu ‘e fanga kuli (hufanga he fakatapu) mo e manupuna ‘o e ‘ataa.
Ka ‘i he maha e ivi ‘o e kau tangilaulau, pea te nau fekumi leva ki he me’a ne tu’unga ai e faka’auha ‘oku hoko. ‘Io, ko e me’a pe te nau ma’u, ko e ‘ikai ha tali (silence). He’ikai foaki mai ‘e Sihova ha fo’i lea ‘e taha, ki he fekumi ‘oku nau fai.
Ola:
Koe’uhi ko ‘enau manumanu mo ta’efaitotonu, ‘e hanga ‘e he ‘Otua ‘o ‘omi ha ngaahi mamahi ki he fonua.
Ko e kau tangata pisinisi ‘o ‘Isileli, ne nau fakakaukau pe ma’a kinautolu, pea ki he lelei pe ‘anautolu (sio-kita); ‘io, ‘o ‘ikai pe ha tokanga ia kiate kinautolu ‘oku fiema’u tokoni. Ka nau hanga hifo kinautolu ia ‘o fakaehaua’i si’i vaivai mo masiva.
Ko e me’a pe ‘oku nau tokanga kinautolu ia ki ai, ko ‘enau pa’anga pe. He kuo hoko eni e fakamahina fo’ou ia pea mo e ‘aho Sapate, ko e taimi mole (‘ikai ma’u ai ha pa’anga) ki he pisinisi. ‘Ikai te nau kei tatali ke fai mo ‘osi e ngaahi 'aho ko eni, kae hoko atu ‘enau fefakatau’aki (‘a ia ne fio pe mo e fefakatau’aki-kaakaa).
Pea nau (kau pisinisi) hoko mai eni ‘o ‘ilo mo e founga kaakaa, ke kaakaa’i ‘aki e kakai; ‘o nau ue’i e me’afua, koe’uhi ke si’i e me’a ‘a e kakai, kae lahi e pa’anga ‘oku nau ma’u. Pea tanaki ki he me’afua ha ngaahi me’a fakamamafa, ko hono kaakaa’i e kakai ‘oku omi ‘o fakatau mei he’enau fale koloa. ‘Ikai ngata ai kae toe fio e uite mo e efu’i kelekele, ‘o fakatau atu ki he kakai; ko hono fakatolonga ‘enau koloa (uite). ‘Ikai ha me’i ‘ofa ‘e taha ‘i honau loto ki he fa’ahinga ‘o e tangata, pe ko ha meesi kiate kinautolu ‘oku ‘ikai lava ‘o totongi honau ngaahi mo’ua. Ka ‘oku fakamalohi’i si’i fa’ahinga ko eni, ke fai e ngaahi ngaue fakapopula, ko hono fetongi e mo’ua ‘oku ‘ikai lava totongi.
Kae hoko mai ‘a e ‘Otua ia, kuo fakapapau ‘i hono loto, he’ikai pe puli/mole ha taha ‘o e ngaahi me’a ni meiate ia. ‘A e ngaahi ngaue kovi ko eni, ‘e ‘ikai mole ia mei he’ene manatu. He ko e fa’ahinga ngaue pango ‘a e manumanu mo e ta’efaitotonu. Pea ‘i hoko mai ‘a e ‘Otua, ‘e nofo tailiili mo tete tete ‘a e ngaahi fonua. Pea ko e tailiili mo tete tete ko eni, ‘e hange ia ko e mahiki hake ‘a e fonua (kelekele mo lolofonua) pea puli hifo; ‘o hange tofu pe ko Naila. Pea ko e ngalulu ko eni e funga ‘o e fonua, ‘e ue’i ai e fa’ahinga kotoa pe ke nau ‘aa ‘o tangi mo kaunga mamahi.
Ko e me'a fakaloloma ko e 'ikai tuku mai ha taimi. Kuo totu'a e ngaue pango 'a e kakai 'Isileli pea lahi mo e 'ikai manatu kia Sihova. Ko e me'a pe eni 'e hoko ko hono tautea'i kinautolu 'e Sihova. 'Io, ko e tautea ka ko ha tautea. He 'oku hanga mai e mate mo e tengihia, pea ko kinautolu 'e tangilaulau te nau mate pe mo kinautolu. 'Io, te nau lele 'o kumi e folofola 'a e 'Otua, kae 'ikai pe ma'u. He 'oku 'i he folofola 'a e fufu'unga mo'ui. 'Oku 'i he folofola 'a e fakamolemole angahala. 'Oku 'i he folofola 'a e faka'ilo hala, 'a e fakatonutonu mo e ngaohia ke ma'oni'oni. 'Io, te nau kumi, mo kumi, mo kumi kae 'ikai pe ma'u e folofola 'a e 'Eiki.
'Oi, he toki me'a fakamanavahe ko e mole 'a Folofola mei he feohi'anga. Talamai ko e Folofola pe 'e taha te ne lava ke tauhi kitautolu ke hoa mo e finangalo 'o e 'Otua; pea ka mole e kona mei he masima, 'e fakakona nai 'e he ha? 'Io, ka mole 'a e faka'ilo hala meiate kitautolu, 'a folofola, te tau fou nai 'i fe?
'Oku kei ui, 'Ala ha'u......Tokanga na'a ne tuku!