Saame 50:1-8,22-23
Ko e Saame ko eni ne fa’u ia ‘e ‘Esafe, ko e toko taha ne taki he kau punake livaite. Pea ko ia pe na’a ne fa’u e ngaahi Saame 73 ki he 83. ‘Oku mahino mei he’ene ngaahi Saame ‘a ‘ene tokanga ki he fakalangilangi ‘Otua ‘a e tangata, pea mo e fatongia ‘o e tangata taki taha ki hono kanga’api; ‘o hange ko ia ne ha he fekau ‘e hongofulu. ‘I he Saame ni, ‘oku talanoa ai ‘a ‘Esafe ki ha fale fakamaau’anga (tokua ‘oku natula faka-hevani). ‘A ia ‘oku ‘afio ai ‘a e ‘Otua, ko hono sivi ‘a e fa’ahinga ‘o e tangata. Pea ‘oku ‘i he fakamaau’anga ha ongo hia ‘e ua, ‘a ia ‘oku tukuaki’i ki ai ‘a e tangata: ko ‘enau founga fakalangilangi ‘Otua pea mo ‘enau ngaue hala’aki e folofola ‘a e ‘Otua. ‘Io, he ‘oku tala ‘o pehee, ko e fakahoifua ‘Otua kuopau ke fai ‘a e feilaulau ‘i he loto hangamalie (ko e loto talangofua mo falala ‘Otua).
Malie e fakamatala ne fai ‘e ‘Esafe. He ‘oku ne kamata’aki pe, hono fakamahino mai ‘a e fakamaau – ko ‘ELA, ‘ELOHIMI mo SIHOVA. Pea ko e taha kotoa pe, mei he ‘isite ki he uesite, mo e noate ki he saute ne nau fakataha kotoa mai ki he fakamaau’anga. Pea mei he ‘afio’anga ‘o e ‘Otua, saione, ‘oku ha mai mei ai ‘a e ‘Otua; ko ‘ene ha’u ke fai e fakamaau. ‘I he’ene ha’u, ‘oku ha’u mo ia ha afi faka’auha mo ha fu’u tu’oni matangi. Ko hono fakamatala’i e fa’ahinga ivi mo e mafimafi mo e fakalilifu e fakamaau ka fai.
Hiki mei ai ‘a ‘Esafe ‘o ne fakamatala kiate kinautolu ne ‘i ai. Talamai ko kinautolu kotoa ‘i he ‘univeesi, te nau hoko ko e kau fakamo’oni ki he me’a ‘oku hoko. ‘Io, ‘a kinautolu ‘oku ‘i he langi, mo kinautolu ‘oku ‘i mamani. Pea ko e fakamaau’i ‘o e tangata, ‘e fai ia ‘i he lotolotonga ‘o e kau fakamo’oni ko eni. Ko kinautolu leva ne fai kovinanite mo e ‘Otua, ‘a e kau ma’oni’oni, ko kinautolu ia ‘a e kau faka’iloa. Pea ko e ‘Otua leva, ‘a e fakamaau totonu.
Ne hoko ai pe ‘a ‘Esafe, ‘o fakamatala ki he hia kuo tukuaki’i ki ai ‘a e tangata. Pea ko e ‘uluaki, ko e founga fakalangilangi ‘Otua. Mahalo ne ‘alu pe taimi mo e mole ia mei ‘Isileli, ‘a e taumu’a totonu ‘o e foaki feilaulau. ‘Io, he ko e foaki feilaulau ko hono fakahaa’i ‘a e fiema’u vivili ‘a e tangata ke feohi ma’u pe mo hono ‘Otua. ‘Oku ‘ikai fiema’u pulu pe kosi ‘a e ‘Otua (tapu mo ia). Ke hange ko e ngaahi ‘Otua mate, ‘o fakamamafa he ngaahi me’a lelei ‘o mamani. Ko hotau ‘Otua, ko ia ia na’a ne ngaohi mo fakatupu e me’a kotoa pe. Pea ‘oku ‘a’ana e me’a kotoa pe. Ko e feilaulau ‘oku foaki ki he ‘Otua, ‘oku ‘ikai ko hono totongi ‘o e ‘Otua; ka ‘oku foaki e feilaulau ko e vivili e fiema’u ‘a e tangata ke feohi mo e ‘Otua. Pea ko e foaki ko ia, ‘oku tu’unga ia he loto hounga’ia pea mo falala ‘Otua. Pea ko eni ia e me’a ‘oku uki ‘e ‘Esafe e kainga ‘Isileli ke kaveinga ‘aki ‘enau feilaulau.
Ko e hia hono ua, ko hono ngaue hala’aki e folofola ‘a e ‘Otua. Mahino mei he fakamatala ‘a ‘Esafe, ‘a e kapa mai e kau faka’ikai’i ‘Otua ‘o ngaue’aki e folofola ‘a e ‘Otua (lao mo e kovinanite); pea nau tala ‘ekinautolu ‘o pehee, ko ‘enau me’a. Hili ko ia, ‘oku ‘ikai te nau tali e fakahinohino ‘a e ‘Otua. Pea neongo ‘enau feohi mo e kakai lotu, ka ‘oku ‘afio’i pe ‘e he ‘Otua honau ngaahi loto. Pea ko e ‘uhinga ia e feinga ko eni ‘a ‘Esafe, ke fei mo mavahe mei he to’onga pehee (lolotonga e kei ma’u faingamalie). Kae fai e feilaulau ‘aki e fakafeta’i, ko e foaki tu’unga he hounga’ia mo e falala ‘Otua. ‘Io, ko e foaki koe’uhi pe, ko e fiema’u ‘e he tangata ke feohi ma’u pe mo hono ‘Otua.
“…Pea ‘oku ne tofa ‘a e hala ke u fakaha ki ai, ‘A e fakamo’ui ‘a ‘Elohimi!”