'Aisea 1:1,10-20
‘I he lesoni ko eni, ‘oku hoko mai ai ‘a ‘Aisea mo e folofola ‘a Sihova ki he kakai ‘o Siuta. Pea ‘oku ne kamata’aki pe ‘i he veesi ‘uluaki ‘a ‘ene fakahoko mai ‘a e ‘ulu’i tohi (ko e Visone), pea mo e kakai ‘oku fakatefito ki ai ‘ene tohi (‘a Siuta mo Selusalema). Pea ‘oku hanga ‘e he ‘ulu’i tohi ‘o fakaha mai, na’e mamata e palofita ni (faka’atamai mo fakalaumalie) pea kau ki ai mo ‘ene fanongo tonu ki he me’a ne tala kiate ia ‘e he ‘Otua. ‘Oku ‘i e tui ne maheni pe ‘a ‘Aisea mo e ‘atakai ‘o Selusalema. ‘A hono temipale, pehee foki ki he fakamaau’anga fakatu’i. Pea ‘oku mahino he talanoa ni, ‘a e fakatefito e palofisai ko eni ‘a ‘Aisea ki he Pule’anga Siuta.
Ko e angahala ‘a e tangata (kakai ‘o Siuta), kuo fu’u lahi pea totu’a. He ‘oku ha pe ia he fakalea ‘o e veesi 10. ‘A e ui e Palofita ni ki he kau hou’eiki (pe ko e kau taki ‘o e Pule’anga Siuta), ‘o ne fetapa‘aki e kupu’i lea, hou’eiki Sotoma. Pea ‘ikai ko ia pe, ka na’a ne to e fetapa’aki, kakai ‘o Komola. Pea ‘oku mahino heni, ‘a e hanga ‘e ‘Aisea ‘o fakatatau e to’onga mo’ui e kakai ‘o Siuta, ki he to’onga mo’ui na’e ‘i Sotoma mo Komola. ‘Io, ‘a hono kau taki pea mo e kakai ‘o e fonua!
‘I he’ene pehee, folofola mai ‘e he ‘Otua, ‘oku ‘ikai ‘aonga ‘enau foaki feilaulau ‘oku fai. ‘Oku ‘ikai ‘aonga ‘a e fanga monumanu mo e tutu ‘inisenisi. Ko e ngaahi katoanga fakafiefia mo e ngaahi katoanga ma’u-me’atokoni, na’a mo ‘enau lotu; kuo hanga kehe ‘a e ‘Otua meiate kinautolu. ‘A e foaki me’a’ofa fakamahina fo’ou. ‘A ‘enau fa’a fakataha he Sapate. ‘A e ngaahi katoanga hange ko e pasova, katoanga fakauike, katoanga ifi talupite, mo e ha fua e ngaahi katoanga ne tu’utu’uni ‘e he Pule’anga Siuta ke fakahoko. Ka ‘oku ‘ikai toe ‘aonga ha taha ‘o e ngaahi me’a ni ki he ‘afio mai ‘a e ‘Otua. He kuo nau afe mei he mo’oni pea mole mo e ‘apasia ‘Otua mei he’enau mo’ui.
‘Oku fakalea ia ‘e he Palofita e to’onga pehee, ko e faikovi. ‘A ‘enau kivoi he foaki feilaulau, hili ko ia kuo nau li’aki e ‘Otua pea fakasikaka’i e tapuha ‘o ‘Isileli. Ko e to’onga mo’ui, ‘oku fehangahangai ‘enau ngaue mo ‘enau kovinanite mo e ‘Otua. Pea kuo hoko ‘enau toutou ‘asi mai (mo e feilaulau), ko e fakakavenga ki he ‘Otua. ‘Io, kuo nau hoko ko e fanau fakahalahala! Pea neongo e lahi ‘enau lotu, ka koe’uhi ko e totu’a ‘enau fai angahala, pea 'oku ‘ikai kei fakahoifua leva e lotu ia. He kuo nau omi ‘o folahi mai honau nima, ‘o kole tokoni ki he ‘Otua; ka ko e ngaahi nima ia ne ‘ikai ma’a. He ko e ngaahi nima fakaehaua mo kaakaa, ‘i he’enau fakaehaua’i mo kaakaa’i si’i kau masiva mo tukuhausia, ‘o hange ko e kau tamai-mate mo e kau uitou. ‘Io, ne vakai hifo e ‘Otua ki he lotu ‘oku nau fai ko e lotu fakaemamata pe. Ko e lotu fakatu’asino pe ‘oku fai. Ka kuopau ke fai e lotu mei he loto ‘apasia ‘Otua, ‘o ha mai ki tu’a ko e fakahoifua.
Kaekehe, ‘oku ‘i ai pe faingamalie ‘oku tuku mai ‘e he ‘Otua, kiate kinautolu ‘oku fakatomala kakato. Pea ko kinautolu ‘oku ‘ikai tafoki mei he’enau angahala, ‘oku hanga mai ha fakamaau kiate kinautolu. ‘Io, ko kinautolu eni ‘oku tu’u ‘enau falala ‘i he’enau foaki feilaulau ‘oku fai; ‘o taku tokua, te nau fa’iteliha pe ‘i he’enau to’onga mo’ui, koloa pe ke lava ‘enau fai feilaulau – he ‘e lava pe ‘e he feilaulau ‘oku nau fai ‘o fakahaofi kinautolu. Ka ko ‘Aisea, ‘oku ne fakamahino mai; ‘oku ‘ikai ma’u ha fakahoifua ia he fai feilaulau, ka kuopau ke o fakataha mo e loto talangofua mo e ‘apasia ‘Otua. ‘Io, he ‘oku mei he loto ‘a e lao koula ‘o e mo’ui; ko e ‘ofa ki he ‘Otua ‘aki e kotoa, pea mo e ‘ofa ki he kaunga’api ‘o hange ko ‘ete ‘ofa kiate kita.
Talamai, kuopau pe ke fufulu ‘etau mo’ui. He ko e ngaahi mo’ui fonu angahala’ia, ‘o ‘ikai to e kehe ia mei he nima toto’ia e kainga Siuta. He neongo ‘e ha kulokula ‘etau ngaahi mo’ui, koe’uhi ko ‘etau ngaahi hia; ka ‘e hoko pe ‘o hinehina, hange ko e sinou. Pea ko e fufulu, ke to’o atu e ngaahi me’a ‘oku ‘uli ai hotau loto. ‘A e ngaahi holi kovi ‘a e kakano, ‘a e faikovi kotoa pe, ‘a e ta’efaitotonu, fakaehaua e tamai-mate mo e uitou; mo e ha fua e ngaahi me’a ‘oku ‘uli ai hotau loto. Talamai ke fufulu. He ‘oku monu’ia e loto ma’a, te ne a’usia e mo’ui ta’engata. ‘Io, ko e loto ma’a ‘a e loto talangofua. Ko e talangofua ki he ‘Otua. Hake he mo’unga pe hifo he tele’a, muimui pe; hala tau he mate pe mo’ui, te te mumui pe (ko e talangofua kakato ki he ui ‘a e ‘Otua). ‘Io, ko e loto talangofua te ne kai e lelei ‘o e fonua. Ko e ha pe me’a te ne fai, ‘e ‘i ai e fua lelei ‘ene ngaue ko ia. Ka ko kinautolu ‘oku toupikoi ke talangofua, ‘e faka’auha kinautolu ‘e honau ngaahi fili. ‘Io, ‘a e ngaahi lelei kotoa pe ne nau ma’u; ‘e ‘auha kotoa pe, koe’uhi ko e ‘ikai fakatomala ‘o talangofua ki he ‘Otua.